Tumatan subalah gunung di hulu banyu
tandik balian mahantak balai
kanjar wan babangsai mamasung malam
garincing galang hyang mangariau alam patilarahan
uu, bubuhan dangsanak malapas kukus dupa
baharum banua
umai, manyanggar di bawah hindau bulan
di bawah garigap ribuan bintang
di palinjangan Garuntung Manau, basuluh undayang
manggantar alam mambang
hutan-hutan takurijat
sungai-sungai manguliat
angin mangaji daun
kadap mangaji ambun
karasmin gaib di alam bumi lamah
mamang balian mambasuh wisa
gamal panjulang mamajah bara
andak sasaji di langgatan, banih wan lamang
supaya alam banua daham rusak
supaya hidup tarasa nyaman
cuh!
Bajauh tukang bulangkir banua
daham barurusak lagi di sia
kaina kami humbalang
kaina kami riwas
kaina kami damak
kami handak jua guring nyanyak
kami handak jua manyambung hinak
Banjarmasin, 30 Juli 2010
(ERIKA ADRIANI, Juara 1 Lomba Cipta Puisi Bhs Banjar - Aruh Sastra Kalsel VII 2010)
Jika Anda menyukai Artikel di blog ini, Silahkan
klik disini untuk berlangganan gratis via email, dengan begitu Anda akan mendapat kiriman artikel setiap ada artikel yang terbit di Blog Indahnya Berbagi
0 komentar:
Posting Komentar